Ахбори зиддунақиз дар бораи ҷон гирифтани гурӯҳи “ДОИШ” дар Афғонистон дигарбора баҳси зарфият ва тавоноиҳои ин гуруҳро ба миён андохтааст

Манбаъ: Sputnik Тоҷикистон" 

Владимир Путин, президенти Русия, дар як ҷаласа бо раҳбарони мақомоти истихборотии Иттиҳоди давлатҳои муштаракулманофеъ аз афзудани хатари ин гуруҳи террористӣ ба кишварҳои ин ҳавза суҳбат кард. Аммо Амирхон Муттақӣ, вазири хориҷаи “Толибон” эълон кард, ки хатари “ДОИШ” ҷиддӣ нест ва ин гуруҳ дар Афғонистон марказ надорад. Аммо дар асл чӣ гап аст?

Sputnik Тоҷикистон ба як идда гузоришҳое даст ёфт, ки иттилооти қобили мулоҳизаеро аз “лонаҳо” – и асосии ин гуруҳ дар вилоятҳои Нангарҳору Нуристони Афғонистон ба даст медиҳанд. Ин гузоришҳо ҳузури “ДОИШ” дар Афғонистонро тасбит ва иддаоҳои “Толибон” – ро рад мекунанд.

ДАСТҲОИ БОЗУ БАРНОМАИ НАВ

Моҳи ноябри соли 2019 артиши Афғонистон дар вулусволии Ачини Нанграҳор як амалиёти густардаеро роҳандозӣ карда буд, ки дар пайи он даҳҳо доишӣ кушта ва 300 ҷангии онҳо, ки 243 нафарашон шаҳрвандони Покистон, Осиёи Марказӣ, Қафқоз ва Эрон буданд, бо ҳудуди 700 зану кӯдак таслим шуданд.

Он замон мақомоти Афғонистон эълон доштанд, ки “ДОИШ” дар Афғонистон комилан саркӯб шудааст ва боқимондаҳояш ба Чапардараи вилояти Кунар паноҳ бурдаанд. Аммо баъди ба қудрат расидани “Толибон” ин гуруҳ дигарбора ба саҳна баргашт.

Нангарҳор – пойгоҳи асосии “Вилояти Хуросон”-и “ДОИШ” аст. Манбаъи Sputnik Тоҷикистон, ки ному вазифааш маҳфуз аст, аз қавли Қорӣ Мансуруллоҳ, як масъули “ДОИШ”-и Хуросон” дар Нангарҳор хабар медиҳад, ки ин гуруҳ фармондеҳиашро таҷдид намуда, барномаи ҷадидеро ба роҳ андохтааст.

“Фаъолияти ин гуруҳ дар марҳалаи ҳозир бо амалиётҳои инфиҷор, интиҳорӣ ва террорҳои ҳадафманд маҳдуд мешавад ва барномаи амалиёти таҳоҷумиро надорад. Дар ҳеҷ вулусволии ин вилоят кадом амалиёти таҳоҷумӣ анҷом надода ва дар фикраш ҳам нест. То баҳори соли 2022 бештар рӯи инфиҷор, интиҳорҳо ва террорҳои ҳадафманд тамаркуз намудааст”, - омадааст дар гузориш.

Қисмати дигари барномаи “ДОИШ” – и Хуросон” кор бо фармондеҳон ва саргурӯҳҳои “Толибон” аст, ки онҳоро ҷалб ва баъд барномаи таҳоҷумиро роҳандозӣ намояд, то дар як амалиёт қаламрави бузургтареро тасарруф кунад.

Инфиҷор, интиҳор ва террорҳои ҳадафманде, ки беш аз як моҳи ахир дар Нангарҳор иттифоқ меафтанд, на фақат воқеияти ин гузоришро, ки миёнаҳои моҳи сентябр таҳия шудааст, балки бозгашти ин ҳаюлои террористиро собит мекунад. Ба эҳтимоли зиёд, ин гуруҳ рӯи барномаи суқути Нангарҳор ва таъсиси як давлати ҷаълии худ дар Афғонистон аст.

ТАҲАРРУКОТИ АЧИН

“ДОИШ” - и Хуросон” тобистони соли равон як гуна “тағйироти кадрӣ” ба амал оварда, масъулини худро барои вилояти Нангарҳор таъйин кард.

Бино ба ин тағйирот, Ҳофиз Гул Аҳмад, машҳур ба Мирвалӣ, 35 – сола, масъули амалиётҳои интиҳорӣ, инфиҷор ва террорҳои ҳадафманд ва Муфтӣ Амиргул, масъули молии “ДОИШи Хуросон” дар вилояти Нангарҳор таъйин шудаанд. Ҳарду аз паштунҳои Оракзай Аҷенсии Аёлати Хайбар Пухтунхоҳи кишвари Покистонанд ва феълан дар вулусволии Ачини вилояти Нангарҳор зиндагӣ мекунанд.

“Ҳофиз Гул Аҳмад як гуруҳи 20-нафарии мусаллаҳ ва имконоти молии беҳтаре дар ихтиёр дорад. Инфиҷору интиҳор дар Нангарҳор ва террори аъзои “Толибон” дар вилоятро ӯ мудирият мекунад”, - гуфт манбаъ.

Ҳофиз Ҷамол, машҳур ба Ҳофиз Барёлай, масъули истихборотии “ДОИШи Хуросон” дар Нангарҳор ва Мулло Кафтархон, машҳур ба Мӯсо, ки қаблан дар ин вазифа буд, муовини ӯ таъйин гардидаанд. Ҳарду сокини вулусволии Ачини вилояти Нангарҳоранд.

Қорӣ Обид ал-Хуросонӣ, масъули низомии “ДОИШи Хуросон” дар Нангарҳор таъйин шудааст, ки феълан дар вулусволии Деҳболои ин вилоят будубош дорад.

“ДОИШ” барои Нангарҳор пули зиёд ихтисос додааст. Пас аз суқути ҳукумати қаблӣ ва ба қудрат расидани “Толибон” то ба ҳол силоҳи зиёд харидорӣ кардааст, ки бештарашон амфур (m4) –и амрикоӣ ба теъдоди се сад мил аст ва муҳиммоти беандоза захира намудааст. Ин силоҳҳоро аксарият фармондеҳони “Толибон” ба фурӯш расондаанд, ки аз нерӯҳои ҳукумати қаблӣ ба даст овардаанд. Аъзои “ДОИШ” шахсӣ ё гуруҳӣ ба ҳеч фирқа ва ё қароргоҳи низомӣ ҳамла накарда, ҳеч силоҳ ба даст наёвардаанд”, - омадааст дар гузориш.

Худи Қорӣ Мансуруллоҳ, дастёри хоси Қорӣ Обид ал-Хуросонӣ аст ва ҳамин фард гуфта, ки “ДОИШи Хуросон” дар ҳоли эҷоди як қитъаи зарбатии панҷсаднафара аст, ки бо силоҳи модерн таҷҳиз гардида ва баъдан, ки амалиётҳои таҳоҷумӣ дар Нангарҳор оғоз шавад, бо ҳамин қитъа оғоз мегардад.

“ДОИШ-и Хуросон” хеле мутмаин аст, ки “Толибон” наметавонанд бо нерӯҳои он муқобила намоянд. Хеле муҷаҳҳаз аст ва бо нерумандӣ амалиёти таҳоҷумии худро оғоз хоҳад намуд. Неруҳои бештари кумакӣ низ аз Вазиристонҳои Шимолӣ ва Ҷанубӣ ҳам вориди Нангарҳор мегардад”, - омадааст дар гузориш.

"КАДРҲОИ ИРОҚ"

Нуристон сарпаноҳи дигари “ДОИШи Хуросон” дар Афғонистон ба шумор меравад. Ин гуруҳ 23 августи 2021 раҳбарии ҷадидашро дар ин вилоят эълон кардааст.

Муфтӣ Муҳаммад Яъқуб, ё Муфтӣ Яъқуб, 45 – сола, бошандаи аслии дараи Заргули вулусволии Барги Матоли вилояти Нуристон масъули умумӣ дар вилояти Нуристон таъйин шуда, ҳоло дар марбутоти ҳамин вулусволӣ ҳузур дорад.

“Муфтӣ Яъқуб дар Ироқ барои “Давлати исломӣ” - и Ироқ хидмат кардааст ва бо террористони кишварҳои Осиёи Миёна, аз ҷумла фармондеҳ Ҳалимуфи Тоҷикистонӣ равобити бисёр хубе доштааст. Вай 130 мусаллаҳ ва равобити ҳасана бо “Толибон”-и Нуристон дорад. Бо онҳо ихтилоф надорад ва ё то ба ҳол даргир нашудааст. Бо «Ал-қоида» ҳамоҳангӣ дорад ва бо аъзои он дар Нуристон дидорҳо доштааст”, - омадааст дар гузориш.

Мавлавӣ Абдулвоҳид, машҳур ба Мавлавӣ Меъёр, бошандаи рустои Куванди вулусволии Вонт Войгали вилояти Нуристон, ки дар солҳои 2019 ва 2020 масъули “ДОИШи Хуросон” дар Нуристон буд,  феълан муовини Муфтӣ Яъқуб таъйин шудааст ва дар зодгоҳаш зиндагӣ мекунад.

“Гуруҳи вай аз 170 мусаллаҳ иборат аст, ки дар вулусволиҳои Комдеш ва Вонт Войгал ҳузур доранд”, - омадааст дар гузориш.

Мавлавӣ Башир, зодаи вулусволии Дуоби вилояти Нуристон, масъули истихбороти “ДОИШи Хуросон” дар вилоят таъйин гардида, дар гузашта бо Муфтӣ Яъқуб дар ҷанги Ироқ буд ва дар Нуристон ҳузур надошт.

Мавлавӣ Аҳмадшоҳ, 48-сола, зодаи Порун, маркази Нуристон аст, ки қаблан дар вилоёти Нангарҳор, Кунар ва Нуристон барои ин гуруҳ ҷангида, ҳоло масъули ҷалбу ҷазби он дар Нуристон таъйин шудааст ва феълан дар вулусволии Вонт Войгал будубош дорад.

Фармондеҳони низомии “ДОИШи Хуросон” дар Нуристон: Нураҳмад, машҳур ба Нуро, ки солҳои 2019 ва 2020 масъули низомии ДОИШи Хуросон дар вилояти Нуристон буд, 35 мусаллаҳ дорад ва таҳти амри Мавлавӣ Меъёр фаъолият мекунад. Мавлавӣ Муҳаммад Тоҳир, зодаи Барги Матол, 50 мусаллаҳ дорад ва фармондеҳи низомии гуруҳ дар ин вулусволӣ аст.

Мавлавӣ Абдусалом, зодаи рустои Девонабобои вулусволии Барги Матол, масъули низомии вулусволии Мандул таъйин шуда, ки феълан дар ин вулусволӣ бо 50 мусаллаҳ ҳузур дорад. Як нафари дигар Қорӣ Билол, зодаи Порун, сардори як гуруҳи понздаҳнафарӣ аст.

 “Ин ташкилот аз тарафи “ДОИШи Хуросон” дар Нуристон манзур гардида, ҳамаи ин афрод дар ин вилоят мавҷуд ва фаъол мебошанд. Дар умум, нерӯҳои он дар Нуристон 350 мусаллаҳ дорад ва шадид бо ҷалбу ҷазб машғул аст, то теъдоди афроди худро зиёд бисозад, зеро то замоне ки теъдоди афродашон зиёд нашавад, гирифтани минтақа ва нуфуз ғайримумкин аст ва бо “Толибон” ҳам рӯёрӯй шудан маъно надорад”, - омадааст дар гузориш.

ПУШТИ "ТАҒЙИРОТИ КАДРӢ"

Иттилои фавқ бар он далолат мекунад, ки ба қудрат расидани “Толибон” дар Афғонистон дасти “ДОИШ” – и Хуросон” – ро барои амалиётҳо дар Афғонистон боз кардааст. Аз сӯи дигар, “тағйироти кадрӣ” – и ин гуруҳ далели боризи он гузоришҳоест, ки фармондеҳон ва ҷангиёнаш аз майдонҳои ҷанги Ховари Миёна ба Афғонистон партоб шудаанд.

Аммо суоли мантиқӣ ин аст, ки чаро “Толибон” бо вуҷуди доштани нерӯву имконоти кофӣ дар ин вилоёт барои нобудии “ДОИШ” талош надоранд?

Ҳамсуҳбати Sputnik Тоҷикистон, ки дар гузашта корманди истихбороти Афғонистон буд, мегӯяд, толибу “ДОИШ” як маъмурият доранд, фақат ин ки байрақи яке сафед ва дигарӣ сиёҳ аст.

“Раҳбари “ДОИШ” - и Хуросон” фарде ба номи “Шаҳоб ал-Муҳоҷир”, шаҳрванди Ироқ аст, ки ба номи номи мустаори “Саноуллоҳ Содиқ” – ро низ ёд мешавад. Вай дар оғоз узви “Ал-қоида”, баъдтар яке аз фармондеҳони “Шабакаи Ҳаққонӣ”-и ҳоло дар қудрат буд. Инфиҷорҳои моҳи август дар Кобулро низ “Муҳоҷир” бо супориши ин шабака анҷом дод. “Шабакаи Ҳаққонӣ” – ро истихбороти Покистон идора мекунад. “Муҳоҷир” ва маркази фармондеҳии “ДОИШ” – и Хуросон” дар Оракзай Аҷенсии Аёлати Хайбар Пухтунхоҳи Покистон қарор доранд”, - гуфт ӯ.

“ДОИШ” – и Хуросон” соли 2015 дар Оракзай Аҷенсии Аёлати Хайбар Пухтунхоҳи Покистон бо раҳбарии Ҳофиз Саидхон, собиқ фармондеҳи Таҳрики Толибони Покистон эъломи мавҷудият карда буд. Шаҳоб ал-Муҳоҷир ҳафтумин раҳбар ва танҳо ғайрипокистониву ғайриафғонистонӣ аст, ки низ наметавон гуфт, охирин бошад.